Ystyried Symud i Gartref Preswyl neu Nyrsio?

Beth yw’r gorau i mi?

Mae’r penderfyniad yma yn un pwysig iawn yn eich bywyd.

Gall cymorth gweithiwr cymdeithasol eich helpu i feddwl hyn trwyddo. Bydd sicrhau cymorth i symud i gartref preswyl neu nyrsio yn ddibynnol ar asesiad o’ch anghenion naill ai pan fyddwch yn yr ysbyty neu’n byw gartref yn y gymuned. Er mwyn derbyn asesiad o’ch anghenion, gallwch ofyn trwy staff y ward pan fyddwch yn yr ysbyty neu gallwch gysylltu’n uniongyrchol ag Adran Gwasanaethau Cymdeithasol (dilynwch y linc isod er mwyn cyrraedd ein tudalen gyswllt).

Gofal preswyl - pa ddewisiadau sydd ar gael?

Os ydych yn dewis gadael eich cartref eich hun mae’r dewis o wahanol gartrefi preswyl sydd ar gael yn eang. Bydd gan y gweithiwr cymdeithasol restr o gartrefi a phamffledi addas fydd yn eich helpu i ddewis a hefyd trefnu i chwi ymweld â gwahanol gartrefi er mwyn eich galluogi i ddewis pa gartref fyddai fwyaf addas i gwrdd â’ch anghenion.

Mae’r Arolygiaeth Safonau Gofal Cymru yn gyfrifol am gofrestru ac archwilio cartrefi yn flynyddol ac mae copïau o’u hadroddiadau archwilio ar gael trwy gysylltu gyda:

Arolygaeth Safonau Gofal Cymru,
Swyddfa Rhanbarthol Gogledd Orllewin Cymru,
Adeiladau’r Llywodraeth,
Penrallt,
Caernarfon,
Gwynedd
LL55 1EP
Ffôn: 01286 662300,
Ffacs: 01286 662301
Ebost: CSIW_NW_Wales_Region@Wales.GSI.gov.uk
Gwefan:gweler y tab ‘gwefannau’ uchod

Darparwyr cydnabyddedig

Fe sylwch y cyfeirir at rai Cartrefi fel ‘Darparwyr Cydnabyddedig’. Mae yna berthynas agos gyda’r Awdurdod Lleol a byddant yn derbyn ffioedd uwch na’r arfer i sicrhau eich bod chwi yn derbyn gofal o safon uchel. Wrth gwrs, os ydych yn dewis Cartref nad yw yn ddarparwr cydnabyddedig gellir trefnu hyn, oherwydd bod rhaid i Gartrefi gael eu cofrestru gyda’r Arolygiaeth Safonau Gofal Cymru Os ydych angen gofal nyrsio, fe all Gweithiwr Cymdeithasol drefnu i chwi symud i Gartref Nyrsio yn dilyn asesiad ac ymgynghoriad gyda chynrychiolwyr o’r Bwrdd Iechyd Lleol.

Cyfrifoldeb Y Bwrdd Iechyd Lleol yw talu am yr elfen gofal nyrsio o’r ffi wythnosol ar gyfer pob preswylydd. Gall y gweithiwr cymdeithasol eich cynghori ar sut i fynd ati i sicrhau’r elfen hon o gymorth ariannol tuag at y ffi wythnosol.

Beth sy’n digwydd nesaf?

Nid yw’n syniad da i ildio eich tenantiaeth neu werthu eich ty nes eich bod yn hapus gyda’ch penderfyniad i symud. Bydd rhai cartrefi yn barod i chwi aros yn y cartref am gyfnod byr er mwyn eich helpu i wneud penderfyniad. Bydd eraill yn eich annog i ddod a mân ddodrefn, celfi neu luniau gyda chwi er mwyn gwneud i chwi deimlo’n gartrefol. Mae ambell i gartref yn barod i dderbyn anifeiliaid anwes, ond dylid trafod hyn gyda rheolwr y cartref cyn gwneud eich penderfyniad.

Beth fydd y gost?

Bydd y swm y byddwch yn ei dalu neu gyfrannu tuag at y ffi wythnosol yn dibynnu ar eich incwm a chyfalaf. Fodd bynnag, rhaid i bawb dalu cyfraniad o’u pensiwn er bod pawb sydd mewn Cartref Preswyl neu Gartref Nyrsio yn cadw lwfans personol wythnosol i’w wario fel y dymunant. Mae’r lwfans personol yn cael ei benderfynu a’i newid yn flynyddol gan yr Adran Waith a Phensiynau. Gosodir lleiafswm a mwyafswm ar gyfer lwfans incwm / cyfalaf yn flynyddol gan y Llywodraeth.

Fel canllaw, bydd pobl sydd ag incwm neu gyfalaf o dan y lleiafswm a gymerir i ystyriaeth (£14,750 yn ystod 2005/06) yn cyfrannu o’u pensiwn ac yn gymwys i dderbyn nawdd gan yr Awdurdod Lleol mewn Cartrefi Preswyl a gan yr Awdurdod Lleol a’r Bwrdd Iechyd Lleol os yn symud i Gartref Nyrsio. Bydd rhaid i bobl sydd ag incwm neu gyfalaf rhwng y lleiafswm a’r mwyafswm a gymerir i ystyriaeth (h.y. rhwng £14,750 a £21,000 yn 2005/06) yn ychwanegol i’w pensiwn gwladol gyfrannu yn unol â’r raddfa symudol.

Ni fydd pobl sydd ag incwm neu gyfalaf sy’n uwch na’r mwyafswm a ganiateir (£21,000 yn ystod 2005/06) yn gymwys i dderbyn cefnogaeth ariannol ac felly yn gorfod talu’r ffioedd yn llawn. Os ydych berchen ar eich tŷ eich hun, bydd gwerth cyfalafol y tŷ yn cael ei gymryd i ystyriaeth oni bai bod eich priod neu berthynas sy’n ddibynnol arnoch yn byw yno.

Gwasanaeth cynghori a chefnogaeth - diogelwch i chi

Efallai y byddwch yn teimlo y byddai ein cefnogaeth o fudd i chi er nad ydych yn gymwys i gefnogaeth ariannol ar y dechrau. Gall y Gwasanaethau Cymdeithasol

• gynnal asesiad o’ch anghenion am ofal preswyl neu nyrsio mewn cartref o’ch dewis chwi
• roddi i chwi amrywiaeth o bamffledi a’ch helpu i ddewis Cartref
• eich cynghori ynglyn â ffioedd
• drefnu cysylltiad gyda’r Cartref Gofal o’ch dewis
• gadw mewn cysylltiad â chwi a’ch cynghori ar yr adeg pan amcangyfrifir eich bod yn gymwys i gefnogaeth ariannol. Dylai’r gwasanaeth yma eich helpu i deimlo’n ddiogel yn eich trefniadau

Beth yw’r dewisiadau eraill?

1. Gai’i aros adref?

Efallai mai cymorth yn y cartref fyddai’r opsiwn gorau. Mae sawl gwasanaeth ar gael byddai’n gallu bod o gymorth yn y cartref.

2. Cefnogaeth i Ofalwyr:

Hwyrach eich bod yn derbyn y gefnogaeth ‘rydych angen ond yn poeni bod y gwaith o ofalu amdanoch wedi mynd yn drech na’ch gofalwr / wraig. Mae cymorth i ofalwyr yn flaenoriaeth newydd a phwysig o Ofal yn y Gymuned.

3. Atgyweirio’ch Cartref:

Os ydych yn ystyried mynd i Gartref Preswyl oherwydd eich bod yn ei chael hi’n anodd atgyweirio neu gynnal cyflwr y tŷ, hwyrach bod cymorth ar gael drwy grantiau gan y Cyngor. Ar y llaw arall efallai eich bod yn ystyried bod eich ty presennol yn rhy fawr ac yn ddrud i’w wresogi ac yn teimlo y byddai’n haws cael cartref llai a hwylusach.

4. Llety Gwarchod:

Mae sawl math o lety gwarchod ar gael - rhai gyda Gwasanaeth Warden, a rhai - fel ‘Abbeyfield’ - sy’n darparu prydiau yn ogystal â chysur diogelwch. Bydd gan y Gweithiwr Cymdeithasol fwy o wybodaeth ynglyn â’r gwasanaethau sydd ar gael yn eich ardal.

5. System Larwm Cymunedol Gofal Môn

Gall Gwasanaethau Gofal Môn ddarparu gwasanaethau ateb / brys dros 24 awr fyddai o bosib yn rhoi hyder a sicrwydd i chwi fod cymorth ar gael os byddwch ei angen.

Cwynion a sylwadau

Os oes unrhyw sylwadau neu gŵyn am y gwasanaethau yr ydych yn eu derbyn gan yr Adran Tai a Gwasanaethau Cymdeithasol, dylid yn y lle cyntaf, gael cyngor pellach drwy gysylltu â’r Swyddog Cwynion.